Formulario de inscrición de familias socias 2021/2022

 Estimadas familias

como sabedes, ao comezo do curso escolar as familias socias da ANPA CEIP Lamas de Abade deben pagar a cota de socio (familiar) e o seguro de accidentes (por cada neno ou nena).

Aquelas familias que aínda non son socias da ANPA deberán cumprimentar tamén o Formulario de inscrición de familia socia.

A cota de socio para o curso 2021/2022 é de 27 € ao ano por familia e a cota do seguro de accidentes é de 6 euros por alumno/a.

Ambos pagamentos deberán realizarse seguindo as instrucións contidas no formulario, indicando no concepto de cada un deles "Nome da persoa socia + cota ANPA" e "Nome alumno/a + cota seguro" segundo corresponda, antes do 15 de outubro. Tamén se poderá facer unha única transferencia con todas as cotas xuntas.

Para completar a inscrición deberá enviar o xustificante de ambos pagos preferentemente por correo electrónico ao enderezo coordinadoralamas@gmail.com ou entregarllo á coordinadora. Infórmaselle de que no caso de non realizar o pago da cota anual de socio daráselle automaticamente de baixa como socio da ANPA CEIP Lamas de Abade.

As familias que xa son socias e queiran modificar algún dato da ficha de socios (incluír un novo irmá ou irmán, cambios de enderezo ou de teléfonos) poderán empregar tamén o Formulario de inscrición de socio. Da mesma maneira, se queren modificar a relación de persoas autorizadas para recoller ao alumno/a deberán actualizar o apartado correspondente no Formulario de inscrición. Este documento, unha vez cuberto e asinado, deberá ser enviado preferentemente por correo electrónico ao enderezo coordinadoralamas@gmail.com ou entregarllo á coordinadora.

Un saúdo .

Información sobre o comedor de primaria

 

Estimadas familias, 

queremos informarvos que a partir do luns, 27 de setembro, o servizo de comedor de primaria será ofrecido nunha soa quenda.

Dende Hostalaría comunicáronnos que neste curso habilitarán de novo o seu comedor, pero que seguen poñendo á nosa disposición o espazo que viñamos empregando até o de agora para servir os menús. Deste xeito, todo o alumnado de primaria poderá xantar ao mesmo tempo, aínda que en dous espazos distintos. Coidamos que este é un avance importante cara a normalidade na prestación deste servizo xa que nos permite eliminar o tempo de espera antes de xantar e posibilita que os usuarios poidan comer con calma.

Tamén nos indicaron que van comezar a retomar a elaboración de menús, pero que por cuestións de organización interna, de momento só poderán facerse cargo dos menús dos nenos e nenas de 4º, 5º e 6º.

Polo tanto, a partir do luns, 27 de setembro, todo o alumnado de primaria xantará na mesma quenda. Os de 1º, 2º e 3º farano no mesmo espazo que o fixeron durante o curso pasado, e o menú será elaborado, igual que no comedor de infantil, pola empresa de cátering “Ruta Jacobea”. As nenas e nenos de 4º, 5º e 6º volverán a xantar no comedor de Hostalaría, e será o alumnado do CIFP “Compostela” quen elabore e sirva os menús. Como indicamos no comunicado inicial, confiamos en que ao longo do curso a situación vaia normalizándose de todo e finalmente sexa Hostalaría a que volva elaborar os menús para todo o alumnado de primaria.

A recollida será a partir das 15:45, aínda que este horario é sempre orientativo, podendo producirse atrasos dependendo das incidencias que poidan producirse durante o servizo de comedor. Os alumnos de 1º, 2º e 3º de Primaria sairán pola porta do pavillón mentres que os de 4º, 5º e 6º agardarán no patio de columnas e recolleranse na porta lateral do centro, a que está ao lado do pavillón. A hora máxima de recollida serán as 16:30.

Un saúdo e moitas grazas.

Comunicación inicio de curso 2021/2022

 

Estimadas familias

Agardamos que todas e todos esteades ben e co ánimo suficiente para comezar un novo curso escolar.

Como informamos no mes de xullo, este curso será posible ofrecer os servizos de comedor e de madruga a todas as familias que o solicitaron no mes de xuño. Indicábamos tamén que os servizos serían prestados de maneira semellante ao curso pasado, sen embargo, despois de realizar algunhas modificacións no comedor do Centro conseguiuse o espazo suficiente para que o alumnado de educación infantil poida xantar na mesma quenda.

De momento, as nenas e nenos de primaria seguirán en dúas quendas. Na primeira xantará o alumnado de 1º, 2º e 3º de Primaria e na segunda quenda os de 4º, 5º e 6º.

As horas de recollida quedarán da seguinte maneira:

Comedor de infantil:

A partir das 15:15

Comedor de Hostalaría:

1ª quenda: a partir das 15:15

2ª quenda: a partir das 16:15

A hora máxima de recollida serán ás 16:30. Somos conscientes de que para moitas familias pode resultar difícil conciliar os seus horarios, pero temos que insistir en que respectedes de maneira rigorosa o horario de saída. Os alumnos de Primaria sairán pola porta do pavillón municipal mentres que os de infantil recolleranse na porta principal do centro, intentando sempre evitar aglomeracións dentro do recinto escolar.

As quendas establecidas e os grupos burbulla (compostos polos alumnos e alumnas de cada aula), serán fixas durante todo o curso escolar polo que non existirá a posibilidade de cambialas baixo ningunha circunstancia.

Por último, o servizo de comedor para infantil e para primaria será ofrecido pola empresa de cátering “Ruta Jacobea”. Confiamos en que ao longo do curso, e dependendo das medidas que vaian establecendo as autoridades educativas e sanitarias, Hostalaría retome a elaboración dos menús para todo ou parte do alumnado de primaria.

No tocante ao Servizo Madruga, a entrada farase dende ás 7:30 ás 8:30, aínda que aqueles usuarios que vaian almorzar terán que chegar de maneira obrigatoria antes das 8:20. Os nenos e nenas serán recollidos polo persoal da ANPA na porta principal do Centro, sendo necesario un rigoroso cumprimento da hora de chegada para que os nenos e nenas teñan o tempo suficiente para almorzar con tranquilidade.

Ao igual que aconteceu o ano pasado, e debido á situación excepcional provocada polo COVID-19, a equipa directiva decidiu que o prazo para anular ou modificar os días de uso do comedor ou do servizo madruga será até o 23 de setembro. Pregamos, sen embargo, que no caso de que vaiades darvos de baixa dalgún servizo enviedes un correo electrónico ao enderezo coordinadoralamas@gmail.com á maior brevidade posible.

Estamos a traballar para volver a organizar actividades extraescolares ao longo do presente curso académico. De momento podemos adiantar que o número de prazas ofertadas será menor que en anos anteriores, polo que debemos perfilar un sistema transparente e obxectivo que permita decidir quen obtén praza no caso de que haxa máis inscritos dos que poden participar nas actividades. En canto teñamos a información completa sobre as extraescolares que finalmente podemos organizar, os horarios e os custos mandaremos unha nota informativa ás familias socias, ademais de publicar a información no blog da ANPA e de solicitarlle ao Centro que envíe esta información a través do ABALAR. De calquera modo, o criterio para determinar que familias obteñen praza será sometido a votación na próxima Asamblea Xeral, que agardamos que poida ter lugar de xeito presencial antes de que remate o mes de setembro.

O prazo para pagar a cota de socio (27 €) e o seguro (6 €) rematará o 15 de outubro. Enviarase un correo electrónico informando sobre a maneira de facer o pagamento, así como o formulario de inscrición para as familias novas (ou aquelas que teñan que facer algún cambio nos seus datos ou autorizar a novas persoas para a recollida das nenas e nenos).

En canto ao custo dos servizos, mantense o prezo do ano pasado: Comedor (5’70 € / día) e Servizo Madruga (1’90 € / día). Nos próximos días recibiredes o recibo do mes de setembro. Para o resto do curso, os pagamentos realizaranse entre os días 1 e 10 de cada mes. O xustificante do pagamento debe enviarse á conta de correo electrónico coordinadoralamas@gmail.com.

Un saúdo e moitas grazas